Cychwynodd llond bws o rieni, plant a chyfeillion ben bore ar Ragfyr 17eg ar wibdaith i Bournville. Cafwyd diwrnod bendigedig a diolch i Lynne a Llinos am drefnu.
Croeso
Croeso’n ôl i bawb i dymor newydd. Croeso arbennig i’r plant bach sydd wedi dechrau’r ysgol. Gobeithio y byddant yn hapus iawn yn ein plith.
Croeso i Mrs Rwth Hughes sydd wedi ymuno â ni fel Gweinyddes Feithrin yn y boreuau.
Gweithgareddau diwedd tymor yr Hydref
Bu plant yr ysgol yn hynod o brysur ar ddiwedd y tymor. Cynhaliwyd ein cyngerdd, cinio a pharti Nadolig yn Neuadd yr Eglwys, Clocaenog. Rydym yn ddiolchgar iawn fod y Neuadd ar gael inni bob amser, yn gynnes, yn lan ac yn hwylus.
Bu'r disgyblion hynaf yn cynhyrchu cardiau Nadolig ar y cyfrifiadur i'w gwerthu. Fe wnaethant elw sylweddol a bellach maent wedi dewis gwario'r arian ar brynu offer chwarae ar y buarth. Diolch yn fawr i bawb brynodd y cardiau.
Cyfeillion yr Ysgol
Bu’r Cyfeillion yn brysur iawn yn gwerthu bwyd yn Sioe Flodau Rhuthun. Gwnaed elw sylweddol er budd yr ysgol. Y llynnedd, prynodd Cyfeillion yr Ysgol lawer o adnoddau at ddefnydd y disgyblion a’r athrawon ac rydym yn ddiolchgar iawn iddynt. Bydd rhaglen o weithgareddau ar gyfer y tymor newydd yn cael ei drefnu’n fuan. Cofiwch ymuno a ni – mae’n gyfle gwych i gymdeithasu a chael hwyl tra’n codi arian i’r ysgol.
Pantomeim Dick Whittington
Cafodd y disgyblion a'r athrawon brynhawn gwych yn Theatr Clwyd ddiwedd Ionawr. Roedd y pantomeim yn gynhyrchiad safonol iawn gyda'r sét, y gwisgoedd, yr effeithiadau arbennig, yr actio a'r canu yn gwefreiddio. Rhaid diolch i Gyfeillion yr Ysgol am eu haelioni yn ysgwyddo cost yr ymweliad.
Newyddion